• सचिन काळभोर यांच्या तक्रारीनंतर प्रदेश नेतृत्वाचा हस्तक्षेप; कोअर कमिटीमध्ये बदल, प्रशांत शितोळे यांना हटवून नव्या कार्यकर्त्याला संधी
.jpg)
पिंपरी-चिंचवड,दि.30: पिंपरी-चिंचवड शहरातील भारतीय जनता पक्षाच्या अंतर्गत कारभारावरून राजकीय वर्तुळात पुन्हा एकदा चर्चा रंगली आहे. महापौर रवी लांडगे यांना महापालिकेतील कामकाज करताना अडथळे निर्माण केले जात असून, ऐनवेळी स्थायी समितीची सभा तहकूब करण्यासाठी दबावतंत्राचा वापर करण्यात आल्याचा गंभीर आरोप भाजप कार्यकर्ते सचिन काळभोर यांनी केला आहे.
या संदर्भात काळभोर यांनी भाजप महाराष्ट्र प्रदेशाध्यक्ष रवींद्र चव्हाण तसेच मुख्यमंत्री देवेंद्र फडणवीस यांच्याकडे लेखी निवेदनाद्वारे तक्रार करून पक्षाच्या वरिष्ठ नेतृत्वाने या प्रकरणात हस्तक्षेप करण्याची मागणी केली होती.
स्थायी समितीची सभा तहकूब करण्यासाठी दबावाचा आरोप
निवेदनात करण्यात आलेल्या आरोपानुसार, एका स्थायी समितीच्या सभेदरम्यान सभा तहकूब करण्यात यावी यासाठी पक्षनेते प्रशांत शितोळे यांनी महापौर रवी लांडगे यांच्यावर दबावतंत्राचा वापर केल्याचा दावा करण्यात आला आहे. त्यामुळे महापौरांना त्यांच्या पदानुसार प्रभावीपणे काम करता येत नसल्याचे काळभोर यांनी म्हटले आहे.
गेल्या वर्षभरात स्वतःच्याच पक्षातील नेत्यांकडून सभांबाबत अडथळे निर्माण होत असल्याचा आरोपही करण्यात आला आहे. अशा प्रकारांमुळे महापौरांची राजकीय प्रतिमा प्रभावित होत असून, शहरातील विकासकामांवरही त्याचा परिणाम होण्याची शक्यता असल्याचे निवेदनात नमूद करण्यात आले आहे.
पक्षांतर्गत मनमानीला आळा घालण्याची मागणी
भाजपचे वरिष्ठ नेतृत्व शहरातील संघटन मजबूत करण्यासाठी प्रयत्न करीत असताना स्थानिक पातळीवर पक्षांतर्गत मतभेद आणि निर्णयप्रक्रियेत हस्तक्षेप होत असल्यास त्याचा पक्षाच्या प्रतिमेवर विपरीत परिणाम होऊ शकतो, अशी भूमिका सचिन काळभोर यांनी मांडली.
महापौरांना कोणत्याही दबावाशिवाय विकासकामे आणि प्रशासकीय कामकाज करण्याचे स्वातंत्र्य मिळावे, तसेच पक्षातील अंतर्गत मनमानीला आळा घालावा, अशी मागणी त्यांनी प्रदेश नेतृत्वाकडे केली होती.
तक्रारीनंतर कोअर कमिटीमध्ये बदल
या तक्रारीच्या पार्श्वभूमीवर पिंपरी-चिंचवड शहर भाजपच्या कार्यकारिणीतील कोअर कमिटीमध्ये बदल करण्यात आल्याचा दावा सचिन काळभोर यांनी केला आहे. पक्षनेते प्रशांत शितोळे यांना कोअर कमिटीमधून हटवून त्यांच्या जागी दुसऱ्या कार्यकर्त्याला संधी देण्यात आल्याचे त्यांनी सांगितले.
या घडामोडीमुळे पिंपरी-चिंचवड भाजपमधील अंतर्गत राजकारण पुन्हा चर्चेत आले आहे. महापौरांच्या कामकाजातील कथित अडथळे, स्थायी समितीच्या सभेचा विषय आणि त्यानंतर झालेला कोअर कमिटीतील बदल यामुळे शहर भाजपमधील राजकीय समीकरणांबाबत विविध चर्चांना उधाण आले आहे.
दरम्यान, सचिन काळभोर यांनी केलेल्या आरोपांवर संबंधित प्रशांत शितोळे यांची अधिकृत भूमिका अद्याप समोर आलेली नसून, त्यांची बाजू समोर आल्यानंतरच या प्रकरणाचे संपूर्ण चित्र स्पष्ट होणार आहे.
