नेटाने बजावणार मताचा अधिकार; ज्येष्ठांनी केला मनाशी निर्धार !
.jpeg)
पिंपरी चिंचवड,दि.26: पिंपळे सौदागर येथील लिनियर गार्डन येथे चैतन्य हास्य क्लब व ज्येष्ठ नागरिक संघाच्या दैनदिन कार्यशाळेत सार्वत्रिक विधानसभा निवडणूक २०२४ मध्ये मतदान करण्याचा निर्धार करण्यात आला. यावेळी पिंपरी चिंचवड महपलिकेच्या आवाहनाला ज्येष्ठ नागरिकांनी उत्स्फूर्त प्रतिसाद दिला व मतदान करण्याची शपथ घेतली.
सार्वत्रिक विधानसभा निवडणूक २०२४ च्या अनुषंगाने पिंपरी चिंचवड महापालिकेच्या हद्दीत येणाऱ्या पिंपरी, भोसरी आणि चिंचवड मतदार संघात मतदानाचे प्रमाण वाढविण्यासाठी महापालिकेच्या वतीने आयुक्त शेखर सिंह आणि अतिरिक्त आयुक्त तथा स्वीप नोडल विजयकुमार खोराटे यांच्या मार्गदर्शनाखाली उप आयुक्त अण्णा बोदडे यांच्या नियंत्रणाखाली मतदार जनजागृती अभियान राबविण्यात येत आहे. त्यानुषंगाने आज सकाळी पिंपळे सौदागर येथील लिनियर गार्डन येथे चैतन्य हास्यक्लब व ज्येष्ठ नागरिक संघाच्या दैनदिन कार्यशाळेत “ करूया योगा, हो मतदार राजा जागा” हा मतदान जनजागृती अभियानाचा उपक्रम राबविण्यात आला.
येथील कार्यक्रमात महापालिकेचे मुख्य लिपिक किशन केंगले, लिपिक अभिजित डोळस,विकास गायकांबळे, पियुष घसिंग यांच्या उपस्थिती मोठ्या संख्यने ज्येष्ठ नागरिकांनी मतदान करण्याबाबत शपथ घेतली. तसेच आपल्या परिसरात आणि सोसायटीमध्ये मतदान करण्याबाबत जनजागृती करण्याचे आश्वासन देखील नागरिकांनी दिले.
पिंपरी चिंचवड सारख्या सर्व सर्वक्षेत्रात पुढारलेल्या शहरात मताचा अधिकार बजावण्याबाबत उदासीनता दिसून येते, ही बाब आपल्या शहराच्या नावलौकिकाला शोभणारी नाही. असे सांगत येत्या विधानसभा निवडणुकीत नेटाने मताचा अधिकार बजावण्याबाबतचा निर्धार ज्येष्ठ नागरिक संघाचे राम साळुंखे यांनी ज्येष्ठ नागरिक संघांच्या वतीने केला.
दरम्यान, काल सायंकाळी महापालिकेच्या स्वीप कक्षामार्फत चिंचवड येथील एलप्रो मॉल येथे मतदार जनजागृती अभियान राबविण्यात आला. यावेळी येत्या विधानसभा निवडणुकीत मतदान करण्याबाबत नागरिकांनी शपथ घेतली. येथील कार्यक्रमात महापालिकेचे मुख्य लिपिक देवेंद्र मोरे, किशन केंगले, लिपिक अभिजित डोळस,विकास गायकांबळे,ओंकार पवार, सचिन महाजन, पियुष घसिंग यांच्यासह युवा, नवमतदार आणि नागरिक उपस्थित होते.
