अंध भेळगाडी चालकावरच अतिक्रमण कारवाई का?; राजकीय दबावाखाली कारवाई होत असल्याचा सचिन काळभोर यांचा आरोप

 परवानाधारक पथारीधारकांवर कारवाई, तर अनधिकृत टपऱ्यांकडे दुर्लक्ष? महापालिका प्रशासनाच्या भूमिकेवर जाहीर आक्षेप

पिंपरी-चिंचवड, दि.04: पिंपरी-चिंचवड महापालिका प्रशासनाकडून अतिक्रमणविरोधी कारवाई करताना समान निकषांचा अवलंब केला जात नसल्याचा आरोप भारतीय जनता पक्षाचे कार्यकर्ते सचिन काळभोर यांनी केला आहे. राजकीय दबावातून निवडक पथारी व हातगाडीधारकांवर कारवाई केली जात असून, काही ठिकाणच्या मोठ्या अतिक्रमणांकडे जाणीवपूर्वक दुर्लक्ष केले जात असल्याचा जाहीर आक्षेप त्यांनी नोंदविला आहे.

निगडी येथील मुंबई-पुणे महामार्गावरील बसथांब्याजवळ भेळगाडी व्यवसाय करणारी व्यक्ती अंध असून, संबंधित व्यक्तीकडे व्यवसायाचा परवाना असल्याचे सांगण्यात येत आहे. असे असतानाही त्यांच्यावर अतिक्रमण कारवाई केली जात असल्याचा दावा काळभोर यांनी केला आहे. एका अंध व्यक्तीच्या उदरनिर्वाहाचे साधन असलेल्या व्यवसायावर कारवाई करण्यापूर्वी प्रशासनाने मानवी आणि सामाजिक दृष्टिकोनातून विचार करावा, अशी मागणी त्यांनी केली आहे.

काळभोर यांनी महापालिका प्रशासनाच्या अतिक्रमण कारवाईच्या पद्धतीवरच प्रश्नचिन्ह उपस्थित केले आहे. जर अतिक्रमणविरोधी कारवाई करायची असेल, तर ती सर्वांसाठी समान असावी; निवडक व्यक्तींनाच लक्ष्य करून कारवाई करणे योग्य नाही, असे त्यांनी म्हटले आहे.

दरम्यान, अ क्षेत्रीय कार्यालय तसेच फ क्षेत्रीय कार्यालयाच्या परिसरात मोठ्या प्रमाणावर अनधिकृत टपऱ्या, हातगाड्या आणि इतर अतिक्रमणे असल्याचा आरोप काळभोर यांनी केला आहे. या ठिकाणीही महापालिका प्रशासनाने नियमाप्रमाणे कारवाई करावी, अशी मागणी त्यांनी केली.

महापालिकेचे अधिकारी घोटकुले आणि भगत यांच्याकडून काही पथारीधारकांवर कारवाई केली जात असून, इतर ठिकाणच्या अतिक्रमणांकडे दुर्लक्ष केले जात असल्याचा आरोपही काळभोर यांनी केला आहे. काही ठिकाणी आर्थिक व्यवहारांमुळे कारवाई केली जात नसल्याचा गंभीर आरोप त्यांनी केला असून, या आरोपांची निष्पक्ष चौकशी करून वस्तुस्थिती जनतेसमोर आणावी, अशी मागणी केली आहे.

"अतिक्रमण कारवाई राजकीय दबावापासून मुक्त असावी"

निगडी बसथांबा परिसरात मोठ्या प्रमाणावर अतिक्रमणे असल्यास प्रशासनाने सर्व अनधिकृत व्यवसायांवर नियमानुसार कारवाई करावी. मात्र, परवाना असलेल्या पथारीधारकांना तसेच अंध व दिव्यांग व्यक्तींना त्यांच्या उपजीविकेचा विचार न करता थेट लक्ष्य करणे अन्यायकारक आहे, असे काळभोर यांनी स्पष्ट केले.

महापालिकेने अतिक्रमण कारवाईसाठी स्पष्ट आणि समान निकष जाहीर करावेत, कारवाईची पारदर्शक नोंद ठेवावी आणि कोणत्याही राजकीय दबावाला बळी न पडता सर्व अतिक्रमणांवर समान पद्धतीने कारवाई करावी, अशी मागणी सचिन काळभोर यांनी केली आहे.

"महापालिका प्रशासनाने निवडक कारवाईचा मार्ग सोडून निष्पक्ष आणि पारदर्शक कारवाई करावी. अंध व्यक्तीच्या हातातील रोजगाराचे साधन काढून घेण्यापूर्वी प्रशासनाने त्याचा मानवी दृष्टिकोनातून विचार करावा," अशी भूमिका काळभोर यांनी मांडली.

महापालिका प्रशासनाकडून या आरोपांवर अद्याप अधिकृत स्पष्टीकरण मिळालेले नसून, प्रशासनाची भूमिका समोर आल्यानंतर या प्रकरणातील वस्तुस्थिती अधिक स्पष्ट होणार आहे.