मुंबई गोवा महामार्गावर माणगाव नजीक कळमजे पुलावरून एसटी बस कोसळून अपघात झाल्याची घटना शनिवारी सकाळी साडेपाच वाजण्याच्या सुमारास घडली. या अपघातात 2 गंभीर तर 20 प्रवासी किरकोळ जखमी झाले आहेत. जखमींना माणगाव उपजिल्हा रुग्णालयात उपचारासाठी हलविण्यात आलेले आहे. एसटी चालकाला डुलकी लागल्याने हा अपघात झाला असल्याचे बोलले जात आहे. बसमधून 44 प्रवासी प्रवास करत होते.
मुंबई आगारातून रातराणी (एमएच 14/ बीटी 0143) एसटी बस दापोलीकडे प्रवाशांना घेऊन निघाली होती. एसटी बस ही पहाटे पाच ते साडेपाच दरम्यान माणगाव नजीक असलेल्या कळमजे पुलावर आली असता चालकाचे बसवरील नियंत्रण सुटून बस पुलाचा कठडा तोडून खाली कोसळली. अपघातांनातर पोलीस, स्थानिक ग्रामस्थ यांनी तातडीने घटनास्थळी पोहचून जखमींना माणगाव उपजिल्हा रुग्णालयात दाखल केले.
सुदैवाने एसटी बस ही नदी पत्रात पडली नाही. अन्यथा बसमधील काही प्रवाशांना आपले प्राण गमवावे लागले असते. काही दिवसांपासून एसटी बसमधील अपघाताच्या प्रमाणात मात्र वाढ होताना दिसत आहे.
