सचिन काळभोर यांची भाजप नेतृत्वाकडे तक्रार; पिंपरी-चिंचवड भाजप कार्यकारिणीत जुन्या कार्यकर्त्यांना डावलल्याचा आरोप
पिंपरी चिंचवड, दि.11 : पिंपरी-चिंचवड शहर भारतीय जनता पक्षाच्या शहर कार्यकारिणीत जुन्या आणि निष्ठावंत कार्यकर्त्यांना योग्य प्रतिनिधित्व दिले जात नसल्याचा आरोप भाजप कार्यकर्ते सचिन काळभोर यांनी केला आहे. याबाबत त्यांनी मुख्यमंत्री Devendra Fadnavis आणि भाजप प्रदेशाध्यक्ष Ravindra Chavan यांच्याकडे ई-मेलद्वारे तक्रार दाखल करून हस्तक्षेपाची मागणी केली आहे.
काळभोर यांनी दिलेल्या निवेदनानुसार, १३ मे २०२५ रोजी शत्रुघ्न काटे यांची पिंपरी-चिंचवड भाजप शहराध्यक्षपदी नियुक्ती झाल्यानंतर शहर कार्यकारिणीच्या रचनेत अनेक जुन्या कार्यकर्त्यांकडे सातत्याने दुर्लक्ष करण्यात आले आहे. पक्षासाठी अनेक वर्षे काम करणाऱ्या आणि विविध सामाजिक तसेच नागरी प्रश्नांवर आंदोलने, मोर्चे व लोकहिताची कामे करणाऱ्या कार्यकर्त्यांना शहर कार्यकारिणीत स्थान मिळाले नसल्याचा आरोप त्यांनी केला आहे.
काळभोर यांच्या मते, पक्षात अलीकडेच प्रवेश केलेल्या काही कार्यकर्त्यांना तसेच काही माजी नगरसेवक आणि आमदार समर्थकांना संघटनात्मक पदांवर प्राधान्य दिले जात आहे. यामुळे पक्षासाठी दीर्घकाळ कार्य करणाऱ्या जुन्या कार्यकर्त्यांमध्ये नाराजीचे वातावरण निर्माण झाले असल्याचा दावा त्यांनी केला.
तसेच, दिवंगत आमदार Laxman Jagtap यांच्या विचारांशी निष्ठा राखून काम करणाऱ्या कार्यकर्त्यांनाही संधी नाकारली जात असल्याचा आरोप त्यांनी केला आहे. आमदार समर्थक कार्यकर्त्यांना शहर कार्यकारिणीत स्थान दिले जात असताना तळागाळातील जुन्या कार्यकर्त्यांना डावलले जात असल्याने पक्षातील असंतोष वाढत असल्याचे त्यांनी नमूद केले.
काळभोर यांनी आपल्या तक्रारीत काही नियुक्त्यांबाबत आक्षेप नोंदवत, संघटनात्मक निर्णयांवर दबाव तंत्राचा प्रभाव असल्याचाही आरोप केला आहे. काही आमदार समर्थकांकडून दबाव आणला जात असून त्यामुळे शहराध्यक्ष शत्रुघ्न काटे यांची भूमिका मर्यादित झाली असल्याची भावना कार्यकर्त्यांमध्ये निर्माण झाली असल्याचा दावा त्यांनी केला. मात्र, या आरोपांबाबत संबंधित पदाधिकारी किंवा पक्ष नेतृत्वाकडून कोणतीही अधिकृत प्रतिक्रिया अद्याप समोर आलेली नाही.
आपल्या निवेदनात काळभोर यांनी म्हटले आहे की, भारतीय जनता पक्ष हा "सबका साथ, सबका विकास" या तत्त्वावर चालणारा पक्ष असून त्याची ताकद तळागाळातील कार्यकर्त्यांमध्ये आहे. त्यामुळे पक्ष संघटना कोणत्याही व्यक्ती किंवा गटापुरती मर्यादित न राहता सर्व निष्ठावंत कार्यकर्त्यांना समान संधी देणारी असावी.
या पार्श्वभूमीवर मुख्यमंत्री देवेंद्र फडणवीस आणि प्रदेशाध्यक्ष रवींद्र चव्हाण यांनी या प्रकरणात तातडीने लक्ष घालून पिंपरी-चिंचवड भाजप शहर कार्यकारिणीत जुन्या कार्यकर्त्यांना योग्य प्रतिनिधित्व मिळेल यासाठी आवश्यक ती कार्यवाही करावी, अशी मागणी सचिन काळभोर यांनी केली आहे.
