ग्रँड टूर सायकल स्पर्धेच्या ११३ कोटींच्या खर्चाची उच्चस्तरीय चौकशी करा! सचिन काळभोर यांची आयुक्त डॉ. विजय सूर्यवंशी यांच्याकडे मागणी
पिंपरी-चिंचवड : पिंपरी-चिंचवड महानगरपालिकेमार्फत आयोजित करण्यात येणाऱ्या ग्रँड टूर सायकल स्पर्धेसाठी प्रस्तावित सुमारे ११३ कोटी रुपयांच्या खर्चावर प्रश्न उपस्थित करण्यात आले आहेत. या खर्चाचे स्वरूप, निविदा प्रक्रिया आणि कंत्राटांच्या वाटपात कथित अनियमितता झाली आहे का, याची उच्चस्तरीय चौकशी करण्यात यावी, अशी मागणी भाजप कार्यकर्ते सचिन काळभोर यांनी महानगरपालिका आयुक्त डॉ. विजय सूर्यवंशी यांच्याकडे निवेदनाद्वारे केली आहे.
स्पर्धेच्या आयोजनासाठी मोठ्या प्रमाणावर सार्वजनिक निधी खर्च होणार असल्याने या खर्चाचा विनियोग पारदर्शक पद्धतीने व्हावा, अशी भूमिका काळभोर यांनी मांडली आहे. स्पर्धेशी संबंधित कंत्राटे, उपकंत्राटे आणि कामांच्या वाटपाबाबतही त्यांनी प्रश्न उपस्थित केले आहेत. महानगरपालिका प्रशासनातील अधिकारी-कर्मचारी, कंत्राटदार आणि लोकप्रतिनिधी यांच्यात आर्थिक हितसंबंध गुंतलेले आहेत का, याची निष्पक्ष चौकशी करण्याची मागणी त्यांनी केली आहे.
रस्त्यांची दुरवस्था असताना कोट्यवधींचा खर्च कशासाठी?
निगडी ते पिंपरीदरम्यान मुंबई-पुणे महामार्गावर मेट्रोच्या कामामुळे अनेक ठिकाणी रस्त्यांची दुरवस्था झाली असून मोठमोठे खड्डे पडल्याची तक्रार नागरिकांकडून करण्यात येत आहे. या समस्येबाबत वारंवार निवेदने देऊनही अपेक्षित कार्यवाही होत नसल्याचा दावा काळभोर यांनी केला आहे. अशा परिस्थितीत स्पर्धेवर मोठा खर्च करण्यापूर्वी नागरिकांच्या मूलभूत सुविधांना प्राधान्य द्यावे, अशी मागणीही त्यांनी केली आहे.
निविदा आणि उपकंत्राटांची तपासणी करण्याची मागणी
स्पर्धेसाठी करण्यात आलेले खर्चाचे अंदाजपत्रक, निविदा प्रक्रिया, कार्यादेश, करारनामे, उपकंत्राटे आणि संबंधित देयके यांची सविस्तर तपासणी करावी, अशी मागणी निवेदनात करण्यात आली आहे. काही कंत्राटदारांकडून लोकप्रतिनिधींच्या नातेवाईकांना उपकंत्राटे मिळाल्याच्या आरोपांचीही स्वतंत्रपणे पडताळणी करावी. कंत्राट प्रक्रियेत हितसंबंधांचा संघर्ष किंवा नियमबाह्य आर्थिक व्यवहार झाले असल्यास त्याची सत्यता तपासून संबंधितांवर नियमानुसार कारवाई करावी, असे काळभोर यांनी म्हटले आहे.
उच्चस्तरीय समिती नेमून कारवाई करा
या संपूर्ण प्रकरणाची चौकशी करण्यासाठी उच्चस्तरीय समिती स्थापन करावी, चौकशीत अनियमितता आढळल्यास संबंधित अधिकारी, कर्मचारी आणि कंत्राटदारांवर नियमानुसार कठोर कारवाई करावी, तसेच केलेल्या कार्यवाहीचा लेखी अहवाल द्यावा, अशी मागणी सचिन काळभोर यांनी आयुक्तांकडे केली आहे.
दरम्यान, ग्रँड टूर सायकल स्पर्धेच्या खर्चाबाबत आणि कंत्राट प्रक्रियेतील कथित अनियमिततेबाबत करण्यात आलेल्या आरोपांची अधिकृत चौकशी होऊन वस्तुस्थिती स्पष्ट होणे महत्त्वाचे ठरणार आहे. या प्रकरणी महानगरपालिका प्रशासनाची अधिकृत भूमिका समोर आलेली नसल्याने चौकशी आणि संबंधित कागदपत्रांच्या पडताळणीनंतरच आरोपांबाबत निष्कर्ष निघू शकतील.
