शंकर महाराज समाधी मठाचा अनधिकृत अन्नछत्र समितीशी संबंध नाही

0 झुंजार झेप न्युज

शंकर महाराज समाधी मठाचा अनधिकृत अन्नछत्र समितीशी संबंध नाही

एफडीएच्या तपासणीत स्वयंपाकघर व प्रसाद वाटप व्यवस्थेत कोणतीही त्रुटी आढळली नाही; विश्वस्त मंडळाचे स्पष्टीकरण

पुणे,दि.21 : श्री सद्गुरू संतवर्य योगीराज शंकर महाराज समाधी मठ, धनकवडी येथील प्रसाद वाटप व्यवस्था नियमितपणे सुरू असून, मठाच्या स्वयंपाकघराची अन्न व औषध प्रशासनाच्या (एफडीए) अधिकाऱ्यांकडून तपासणी करण्यात आली आहे. या तपासणीत कोणत्याही प्रकारच्या त्रुटी आढळून आलेल्या नाहीत, अशी माहिती ट्रस्टचे अध्यक्ष डॉ. मिहीर कुलकर्णी आणि सचिव श्री. सतीश कोकाटे यांनी दिली.

श्री सद्गुरू संतवर्य योगीराज शंकर महाराज समाधी ट्रस्ट (ए-७९३) यांच्याकडे अन्न व औषध प्रशासनाचा रीतसर अधिकृत परवाना आहे. शंकर महाराज यांच्या प्रकट दिनानिमित्त एफडीए, पुणे कार्यालयातील अधिकाऱ्यांनी समाधी मठातील अद्ययावत स्वयंपाकघराची तसेच प्रसाद वाटप व्यवस्थेची प्रत्यक्ष तपासणी केली. या तपासणीदरम्यान कोणत्याही त्रुटी निदर्शनास आल्या नसल्याचे ट्रस्टने स्पष्ट केले.

दरम्यान, १८ नोव्हेंबर रोजी वर्तमानपत्रे आणि समाजमाध्यमांवर अन्न व औषध प्रशासनाच्या कारवाईसंदर्भात प्रसिद्ध होत असलेल्या बातम्या या समाधी मठाच्या बाहेरील अनधिकृत *शंकर महाराज अन्नछत्र समिती* संदर्भातील आहेत. या समितीचा श्री सद्गुरू शंकर महाराज समाधी मठाशी अथवा समाधी ट्रस्टशी कोणताही संबंध नाही, असे विश्वस्त मंडळाने जाहीर निवेदनाद्वारे स्पष्ट केले आहे.

संबंधित कारवाईच्या बातम्यांमुळे समाधी ट्रस्टबाबत भाविकांमध्ये कोणताही गैरसमज निर्माण होऊ नये किंवा दिशाभूल होऊ नये, असे आवाहनही विश्वस्त मंडळाने केले आहे. समाधी मठातील प्रसाद वाटपाची व्यवस्था नेहमीप्रमाणे नियमितपणे सुरू असल्याचेही ट्रस्टने स्पष्ट केले आहे.

यावेळी विश्वस्त मंडळाचे अध्यक्ष *डॉ. मिहीर कुलकर्णी, सचिव **श्री. सतीश कोकाटे, तसेच विश्वस्त **श्री. सुरेंद्र वाईकर, डॉ. पी. डी. पाटील, श्री. निलेश मालपाणी आणि श्री. प्रताप भोसले* यांनी भाविकांनी कोणत्याही अफवांवर विश्वास ठेवू नये, असे आवाहन केले आहे

Post a Comment

0 Comments
* Please Don't Spam Here. All the Comments are Reviewed by Admin.

आमच्या विषयी

झुंजार झेप न्यूज हे सत्य आणि निष्पक्ष पत्रकारितेसाठी झुंजारपणे उभं राहिलेलं एक व्यासपीठ आहे. आमचा उद्देश समाजातील घडामोडी प्रामाणिकपणे लोकांपर्यंत पोहोचवणे हा आहे. ग्रामीण ते शहरी, प्रत्येकाच्या आवाजाला आम्ही मंच देतो. राजकारण, समाज, शिक्षण, शेती, रोजगार यांसह सर्व महत्त्वाच्या क्षेत्रांवर लक्ष केंद्रित करतो. आपला विश्वास आणि पाठिंबा हेच आमच्या झुंजार झेपेचं खरं बळ आहे.