भरपाई द्या ; अन्यथा जलसमाधी घेऊ चिंचाळा येथील शेतकऱ्यांचा इशारा
विहामांडवा,(किशोर धायकर पैठण प्रतिनिधी) : अतिवृष्टीमुळे शेतकऱ्यांचे अतोनात नुकसान झाले असून , सरकारने पैठण तालुक्यात ओला दुष्काळ जाहीर करावा . मागच्या वर्षीचा अतिवृष्टीचा राहिलेला दुसरा हप्ता दिवाळीपूर्वी द्यावा ; अन्यथा जायकवाडी धरणात जलसमाधी घेण्याचा इशारा चिंचाळा येथील शेतकरी विजयसिंग बोडखे पाटील यांनी दिला आहे . ' मी माझ्या शेतात चार एकर शेतात कापसाची लागवड केली होती . पावसाळ्याच्या सुरुवातीला चांगला पाऊस पडल्याने पिकांची
चांगली वाढ झाली होती . मात्र , सप्टेंबर महिन्याच्या शेवटच्या व ऑक्टोबर महिन्याच्या सुरुवातीला अतिवृष्टी झाल्याने माझ्या शेतातील कापसाच्या पिकाचे मोठे नुकसान झाले आहे . सध्या , चार एकर पैकी केवळ दहा गुंठ्यांतील पीक सुरक्षित असून आता लागवडीचाही खर्च निघणे मुश्किल झाला आहे ,
अशी प्रतिक्रिया शेतकरी विजयसिंग बोडखे यांनी दिली . यामुळे मी तहसीलदार साहेबाना निवेदन दिले आहे . ' मी तहसीलदार यांना दिलेल्या निवेदनात , सगळीकडे अतिवृष्टी झाल्याने पैठण तालुक्यात ओला दुष्काळ जाहीर करावा . व मागच्या वर्षीचा अतिवृष्टीचा राहिलेला दुसरा हप्ता त्वरित देण्याची मागणी केली आहे . मागण्या पूर्ण न झाल्यास मी जायकवाडी धरणात जलसमाधी घेण्याचा इशारा दिला आहे , ' असेही बोडखे यांनी सांगितले .
