पिंपरी-चिंचवड शहराच्या महापौरपदी सांगवीचे प्रतिनिधित्व करणा-या भाजपच्या उषा उर्फ माई ढोरे यांची बहुमताने निवड झाली. त्या शहराच्या 26 व्या तर सातव्या महिला महापौर झाल्या आहेत. त्यांना 81 मते पडली. तर, राष्ट्रवादीच्या स्वाती उर्फ माई काटे यांचा पराभव झाला. त्यांना 41 मते पडली. ढोरे 40 मतांनी विजयी झाल्या. उपमहापौरपदी भाजपचे तुषार हिंगे बिनविरोध निवडून आले. दरम्यान, अपक्षांनी भाजपला मतदान केले.
शिवसेनेच्या सहा नगरसेवकांनी राष्ट्रवादीला मतदान केले. तर, निलेश बारणे, प्रमोद कुटे गैरहजर राहिले. मनसेचे सचिन चिखले आणि अपक्ष नवनाथ जगताप देखील गैरहजर राहिले. महापौर आणि उपमहापौरपदाच्या रिक्त जागेसाठी आज (शुक्रवारी) निवडणूक घेण्यात आली
पीठासीन अधिकारी म्हणून पुणे महापालिकेचे अतिरिक्त आयुक्त शांतनु गोयल यांनी कामकाज पाहिले. सकाळी अकरा वाजता निवडणुकीला सुरूवात झाली. त्यांनी महापौरपदाच्या अर्जांची छाननी केली. माघारीसाठी 15 मिनिटांचा वेळ दिला. परंतु, माई काटे यांनी माघार घेतली नाही. त्यामुळे महापौरपदासाठी मतदान घेण्यात आले. माई ढोरे यांना 81 मते मिळाली. 'राष्ट्रवादी'च्या माई काटे यांना 41 मते मिळाली. 40 मतांनी ढोरे विजयी झाल्याचे जाहीर करण्यात आले.
