अहमदनगर | कर्जत पंचायत समितीमधील भाजपची सत्ता राष्ट्रवादीच्या ताब्यात आली आहे. भाजपचे नेते आणि माजी आमदार राम शिंदे यांना राष्ट्रवादीचे युवा आमदार रोहित पवार यांनी पुन्हा एकदा धक्का दिला. कर्जत पंचायत समितीमध्ये आठ सदस्य असलेल्या सभापतीच्या निवडणुकीत राष्ट्रवादी काँग्रेस गटाच्या आश्विनी कानगुडे यांनी विजय मिळवला आहे.
कर्जत पंचायत समितीमध्ये सहा महिन्यांपूर्वी झालेल्या निवडणुकीत राष्ट्रवादीच्या साधना कदम भाजपमध्ये जाऊन सभापती झाल्या होत्या. या निवडणुकीत कदम उभ्या राहिल्या नाहीत. त्यामुळे भाजपचे दोन आणि शिवसेनेचा एक, असे तीनच सदस्य भाजपकडे राहिले. संख्याबळ नसल्याने भाजपने सभापतीचा अर्ज मागे घेतला.
कर्जत जामखेड विधानसभा निवडणुकीत रोहित पवार यांनी राम शिंदे यांचा पराभव केला होता. आरोप प्रत्यारोप आणि टीकांनी कर्जत जामखेडची निवडणूक गाजली होती. रोहित पवार यांनी कर्जत जामखेड मतदार संघातून राम शिंदेंना 43 हजार 947 मतांनी पराभूत केलं होतं.
दरम्यान. निवडणुकीतील सर्व मतभेद बाजुला ठेवून रोहित पवार यांनी राम शिंदे यांच्या घरी जाऊन त्यांची भेट घेतली होती. एवढंच नाही तर शिंदे यांच्या मातोश्रींचा आशीर्वाददेखील पवारांनी घेतला होता.
