बोगस एफडीआर प्रकरणातील त्या १८ ठेकेदारांवर फौजदारी गुन्हे दाखल करा..
पिंपरी (दि. ०१ जानेवारी २०२१) :- महापालिकेची विकासकामे घेताना ठेकेदारांनी बोगस एफडीआर आणि बँक हमी दिल्याचे आढळून आले आहे. त्या १८ ठेकेदराना तीन वर्षासाठी काळ्या यादीत टाकण्यात आले आहे. त्यांची नावे महापालिकेने जाहीर केली आहेत. त्या ठेकेदारावर फौजदारी गुन्हे दाखल करण्याचे निर्देश स्थायी समिती सभेत देण्यात आले आहेत. मात्र, ठेकेदारांवर फौजदारी गुन्हे दाखल करण्यासाठी चालढकल केली जात आहे.
याबाबत अपक्ष आघाडीचे गटनेते कैलास बारणे यांनी पुण्यात राज्याचे गृहमंत्री अनिल देशमुख यांची भेट घेतली. महापालिकेची फसवणूक करणा-या १८ ठेकेदारांवर गुन्हे दाखल करण्याची मागणी बारणे यांनी निवेदनाद्वारे गृहमंत्रांकडे केली आहे.
निवेदनात त्यांनी म्हटले की, याप्रकरणी पोलिसांकडे तक्रार कोणी द्यायची यावरून शहर अभियंता, सर्व प्रभागाचे कार्यकारी अभियंता, बीआरटीएस, ईडब्ल्यूएस प्रकल्प अधिका-यामध्ये मतभेद निर्माण झाले आहेत. प्रत्येक जण एकमेकांकडे बोट दाखवून तक्रार देण्यास नकार देत आहेत. त्यामुळे ठेकेदारांना पाठबळ मिळत आहे. याबाबत महापालिका आयुक्त श्रावण हर्डीकर यांनीही दुर्लक्ष केले आहे. याची दखल घेऊन कारवाई करावी, अशी विनंती नगरसेवक बारणे यांनी केली आहे.
